Franken (Region)

Franke (au Frankeland) isch e Regioon z Dütschland. Si zäichnet sich us dur kulturelli und sproochligi Äigehäite und isch öbbe idäntisch mit em Gebiet, wo die ostfränkischi Dialäktgrubbe (in dr Umgangssprooch Fränkisch) vorherrscht. Zu Franke ghööre im Wääsentlige d Bezirk Ooberfranke, Underfranke und Middelfranke in Bayre, dr nordöstlig Beriich vo dr Region Heilbronn-Franken in Baade-Württebärg und s Gebiet Südthüringe, wo au ostfränkisch gschwätzt wird, und chliineri Däil vo Hesse. En offizielli Gränze het Franke aber nit.

Dr Begriff Franke bezäichnet au d Volksgrubbe, wo im Wääsentlige in deere Regioon läbt. Die muess mä vom germanische Volksstamm vo de Franke underschäide und het historisch däm sis östligste Siidligsgebiet bildet. D Ursprüng vo Franke lige in dr Aasiidlig vo de Franke sit em 6. Joorhundert Maingebiet, wo vorher woorschinlig vor allem Elbgermane gläbt häi. Spöötistens sit em 9. Joorhundert isch s Gebiet as Francia Orientalis (Ostfranke) bekannt, und het im Hoochmiddelalter im Wääsentlige dr Ostdäil vom fränkische Stammherzogdums usgmacht und sit 1500 dr Fränkisch Riichskräis.^[1] Wo dr Napoleon die süddütsche Staate noch em Ändi vom Häilige Römische Riich nöi gliideret het, isch dr grösst Däil vo Franke zu Bayre choo.^[2]

1. ↑ Rudolf Endres: Der Fränkische Reichskreis. In: Hefte zur Bayerischen Geschichte und Kultur 29, uusegee vom Haus der Bayerischen Geschichte, Rägensburg 2003, S. 6, lueg Onläin-Wersioon (pdf)
2. ↑ Manfred Treml: Das Königreich Bayern (1806–1918). In: Politische Geschichte Bayerns, uusegee vom Haus der Bayerischen Geschichte as Heft 9 vo de Hefte zur Bayerischen Geschichte und Kultur, 1989, S. 22–25, doo: S. 22